Ubu bukangurambaga buzakorerwa ku mashuri y’abakobwa ari mu ntara y’iburasirazuba ndetse ngo bizagera no kubaturage basanzwe, nkuko babitangaje ubwo batangiraga iki gikorwa kuri iki cyumweru tariki 19/10/2014.

Ubuyobozi bw’ishuri FAWE Girls School Kayonza nabwo bwakiriye neza iyi gahunda.

Bamwe mu banyehsuri biga mu kigo FAWE Girls school Kayonza ubwo bagezwagaho ubutumwa n’iyi Club, mu bibazo babazaga wabonaga bafite inyota nyinshi yo kumenya neza uko bakwirinda SIDA ndetse n’izindi ndwara zandurira mu mibonano mpuzabitsina ndetse banagaragaza ko bakeneye inyigisho nk’izo.

Aba badamu bavuga ko impamvu bahisemo amashuri y’abakobwa ari uko umubare w’abandura icyorezo cya SIDA mu gihugu ndetse no hirya no hino ku isi higanjemo igitsina gore n’urubyiruko.

Abajyanama mu myumvire ba Urumuri Women Club hamwe n’umuyobozi w’ikigo cya FAWE Girls School Kayonza.

Perezidante w’iyi club Umutoni Ernestine yagize ati : ’’Muri iyi minsi bimaze kugaragara ko urubyiruko cyane cyane abana b’abakobwa bugarijwe n’ibibazo bikomeye birimo ihohoterwa , icyorezo cya SIDA, inda zitateganijwe, byose biganisha mu gatakaza amahirwe yabo yo kubaho , guhagarika amashuri , kuba ibirara no kwishora mu biyobyabwenge.’’

Umujyanama mu myumvire w’iyi club Nyinawingeri Diane avuga ko impamvu igitsinagore aribo bibasiwe n’icyorezo cya SIDA kurusha abagabo ari ubukene kuko abagore bicuruza mu buraya baruta cyane abagabo bajya mu busambanyi, ihohoterwa kenshi rishingiye ku gitsina rikorerwa abakobwa n’abagore, ubujiji butuma habaho gukora imibonano mpuzabitsina idakingiye n’ibindi.

Aba banyeshuri bahawe inyigisho wabonaga afite inyota nyinshi yo kumenya.

Nyinawingeri akomeza avuga ko impamvu zituma urubyiruko rwishora mu mibonano mpuzabitsina ari ubukene, kutamenya gufata icyemezo, uburara, kunywa ibiyobyabwenge, irari cyane cyane ku bana b’abakobwa , filmi z’urukozasoni n’ikibazo cy’imyumvire.

Sister Musanabaganwa Laetitia uyobora FAWE Girls School Kayonza hamwe mu hatangiriye iki gikorwa, we yashimangiye ko kwifata ariyo ntwaro ikomeye mu kwirinda icyorezo cya SIDA ndetse no kudacumura ku Mana. Yashishikarije abana b’abakobwa kwifata kugeza igihe bazabona abo bashingana urugo.

Abanyeshuri babonye umwanya wo kubaza no gutanga ibitekerezo.

Abanyeshuri basobanuriwe uburyo SIDA yandura, ibimenyetso byayo n’uburyo bwo kuyirinda.Ikindi gikorwa cyabaye mu bukangurambaga ni ugushishikariza abanyeshuri b’abakobwa kwitabira imyuga bagategura ejo hazaza.

Gakwaya Jean Claude