Uyu mukecuru yahunze mu mwaka wa 1994 akaba yarahungiye mu ntara ya Masisi, akaba yarajyanye n’umugabo n’abana ariko umugabo we ntibageranyeyo kuko we yapfiriye mu nzira.

Akigera muri Kongo yashatse undi mugabo w’Umunyekongo ari nawe wamubuzaga gutaha ariko nyuma yo kumva ko mu Rwanda ari amahoro yahisemo kumutoroka nibwo kuri uyu wa gatatu yasesekaye mu karere ka Rutsiro.

Uyu mukecuru yabashije gutorokana abana 3 muri 6 harimo n’umukobwa we mukuru nawe wazanye batatu.

Yagize ati “nahunze mu mwaka wa 1994 mpita njya Masisi ariko kuko nagezeyo umugabo wanjye yaraguye mu nzira nibwo nahise nshakana n’umukongomani gusa yambuzaga gutaha nibwo nahisemo kumutoroka njye n’abana batatu”.

Uyu mukecuru avuga ko muri Kongo bari batunzwe no guhinga ndetse no gutwika amakara kugirango babone uko babaho.

Umukecuru Nyiraminani n’abo bazanye basesekaye ku butaka bwa Rutsiro bazanwe n’imodoka ya HCR.

Muri Kongo ngo bakunze kubwirwa ko mu Rwanda nta mahoro ahari ariko ngo nyuma bajyaga bumva amakuru ava mu Rwanda ari nayo mpamvu yahisemo gutaha.

Uyu mukecuru yahunze yari atuye ahahoze hitwa komini Mabanza ubu hakaba ari mu karere ka Rutsiro mu murenge wa Mushubati akaba atahukanye n’abana 3 muri 6 bari bafite, muri abo bana 3 harimo n’umukobwa we mukuru nawe wari warashatse Umunyekongo.

Mbarushimana Aimable