Seminega avuga ko yahimbye iyi ndirimbo nyuma yo kubona ukuntu kuri iyi isi abantu bagenda batera umugongo Imana yabaremye, aho urukundo rugenda rukonja mu bantu, abantu ntibizerane, ubugome bukagenda bwiyongera hirya no hino ku isi, bikamutera kwicara akareba uruhare yagira ngo atange umuganda we mu guhindura abantu.

Mu ndirimbo Mwami Dutabare, umuhanzi Seminega avugamo ko Yezu yapfuye kugira ngo ahongerere ibyaha by’abantu nyamara ko bo batabimenye bagakomeza kumusubiza ku musaraba.

Seminega avuga ko guhindura abantu wenyine bidashoboka nyamara ko buri wese mu ntege nke ze afite yashyiraho uruhare rwe hagahinduka nibura bake.

Umuhanzi Seminega.

Agira ati “iyo wisuzuguye wibwira ko ijwi ryawe ntaho ryagera ngo rihindure abantu ucika intege, nyamara uko ijwi rito ryanjye ryiyungikanyije n’iry’undi rito bihinduka ijwi rinini, kandi niyo twahindura umuntu umwe tuba turokoye ubuzima bw’umuntu”.

Umuhanzi Seminega avuga ko ariyo ndirimbo ahereyeho mu buhanzi bwe ariko ko azakomeza guha ubutumwa bwiza abatuye isi ndetse n’Abanyarwanda by’umwihariko ngo bakomeze bategure kuzabana na Nyagasani ubuziraherezo, baharanira guhindura isi, yamaze kuzura ibibi byinshi.

Indirimbo MWAMI DUTABARE yakorewe muri studio yitwa Intare studio iri mu karere ka Rusizi, Seminega akaba ari umuhanzi utuye mu mujyi wa Kigali i Remera, akaba avuga ko amashusho y’iyi ndirimbo nayo azaba yagiye hanze mu minsi ya vuba.

Umugwaneza Jean Claude