Ababatijwe bose hamwe ni 170 higanjemo urubyiruko ndetse n’abakuze. Bamwe nta matorero cyangwa amadini babarizwagamo. Ibi byaje nyuma y’igiterane cy’iminsi 2 cyakozwe n’iri torero ku nsanganyamatsiko igira iti “Yesu araje iki nicyo gihe kugira ngo tumwitegure.”

Ababatijwe bahagaze inyuma y’abashumba b’itorero ry’abadive mu ntara ya Nyagatare.

Mu nyigisho Pasitori Mukara Charles uyobora itorero ry’abadivantisite b’umunsi wa karindwi intara ya Nyagatare yagejeje kuri aba babatijwe yabasabye kwirinda ibiyobyabwenge cyane inzoga zo mu mashashi na Kanyanga dore ko n’akarere ka Nyagatare bukunze kuhagaragara cyane kubera guturana n’ibihugu nka Uganda na Tanzaniya bitabujijwe.

Urubyiruko ariko by’umwihariko rwanasabwe kwirinda ingeso mbi y’uburaya kuko uretse kwangiza ubuzima bwabo n’Imana ibyanga urunuka.
Uretse n’ibyo aba babatijwe banibukijwe ko aribo mutungo w’igihugu bityo bagomba kwirinda ibyaha kugira ngo babashe guteza imbere imiryango yabo n’igihugu muri rusange.

Hari ababatijwe baturutse mu yandi matorero.

Kabatesi Justine umwe mu babatijwe yemeza ko uyu mwaka yari yaragambiriye kwiyegurira Imana kuko yabonaga ko ibyo akora bitayinejeje.
Kuba habatijwe umubare ungana utya Pasitori Mukara avuga ko byaturutse ku nyigisho zisobanutse. Ngo basesenguye Bibiliya cyane bituma abitabiriye igiterane bose biyemeza kugarukira Imana.

Gusa ngo ibyumweru bibiri ntibihagije ngo bazakomeza kubakurikirana barusheho gucengerwa neza n’agakiza no kurushaho gukora ibyo Imana ishaka. Nyuma yo kubona uyu musaruro w’iki giterane ngo bagiye kubishyiramo imbaraga kugira ngo Abanyarwanda benshi bakire agakiza bityo batunganire ubuyobozi ndetse bazabone n’ubwami bw’Imana.

Hakozwe igiterane cy’ibyumweru bibiri abantu bigishwa Bibiliya.

Sebasaza Gasana Emmanuel