Umuyobozi w’ungirije wa Polisi, DIGP Juvenal Marizamunda, avuga ko nk’uko biteganywa n’umuryango w’Abibumbye, hari gahunda yo kongera umubare w’abagore babungabunga amahoro ku isi.

Abazatoranywa mu Rwanda bagomba gukomeza kwitwara neza, kuko ari byo byatumye iyi gahunda ihera mu Rwanda; nk’uko Umuyobozi w’ungirije wa Polisi yabobanuye ubwo yatangizaha aya mahugurwa kuri uyu wa 01/09/2014.

Abapolisi b’abakobwa n’abagore batangiye amaguhurwa yateguwe na UN ku bijyanye no gucunga umutekano mu bihugu birimo imvururu.

Yagize ati “Icyo tubasaba cya mbere ni ugukomeza kugaragaza ikinyabupfura n’ubushobozi busanzwe buranga Abannyarwanda muri rusange n’Abanyarwndakazi by’umwihariko, no kujyana ubunararibonye dufite hano mu Rwanda kugira ngo bajye gufasha ibyo bihugu biba byaragiye bizahazwa n’intambara.”

CP. Martin Lany ari nawe ukuriye iri tsinda ry’impuguke ry’umuryango w’abibumbye, avuga ko ikigamijwe atari ukugira umubare munini w’abapolisi b’abagore, ahubwo harimo no kubongerera ubumenyi buba bukenewe mu gihe bari mu kazi.

Ati “Iki ngenzi si ukugira umubare munini w’aba ofisiye b’abakobwa ahubwo ni umubare munini w’abumvise uburyo ibyo bihugu byazahajwe biteye. Muri aya mahugurwa tugiye kwibanda ku kubongerera ubusesenguzi, uburyo bakusanyamo amakuru n’uburyo hahita bareba igikenewe mu bihe bikomeye.”

Abazahabwa aya mahugurwa bizabafasha kwitabira ikizami cya UN bafite ubumenyi buhagije.

Kugeza ubu u Rwanda ruza ku isonga mu bihugu bya Afurika bifite umubare munini w’abapolisi bari mu butumwa b’amahoro mu bihugu bitandukanye. Abagore 76 bari mu bihugu nka Centrafrique, Soudani y’Amajyepfo, Haiti, Mali, Darfur.

Emmanuel N. Hitimana