Nkuko bivugwa n’umunyamabanga nshingwabikorwa w’umurenge wa Ngororero, Simpenzwe Pascal, ngo guhuza amasomo bizanafasha abarimu bayigisha kubona umwanya wo kuyategura bafatanyije bakunganirana aho babikeneye, nkuko imikoranire ikunze kuranga abarimu bo muri uyu murenge.

Mbere yo gushyiraho ubu buryo ngo hari abanyeshuri wasangaga binubira kwiga amasomo amwe n’amwe asaba imbaraga ariko bakayiga mu masaha ya nyuma ya saa sita bananiwe, nk’amasomo arebana n’imibare myinshi, ubu bakaba barayashyize ku masaha atananiza abanyeshuri.

Uku guhuza amasaha y’amasomo mu mashuri kandi ngo byanaciye akajagari n’ubunebwe byagaragaraga mu banyeshuri aho bamwe batiraga amakayi bagenzi babo bo ku bindi bigo begeranye, bityo bakigira mu ikayi imwe ari benshi nkuko byagiye bigaragara kuri bamwe mu banyeshuri.

Biteganyijwe ko aka gashya ko mu murenge wa Ngororero nigatanga umusaruro mu kuzamura ubumenyi n’imyitwarirre y’abanyeshuri n’abarimu, kazakoreshwa no mu yindi mirenge hagamijwe kugera ku ntego z’uburezi.

Umuyobozi wungirije ushinzwe imibereho myiza y’abaturage mu karere ka Ngororero unafite uburezi mu nshingano ze avuga ko abayobozi n’abarezi befite uburenganzira bwo guhimba udushya tuganisha aheza mu burezi, kandi ko ababikoze neza bakwiye kubera abandi urugero.

Avuga ko akarere ka Ngororero kitaye cyane ku burezi haba mu mashuri asanzwe no mu y’imyuga akomeje kwiyongera muri aka karere.

Ernest Kalinganire