Akagari ka Ruyenzi kagizwe n’imidugudu itanu, usanga umudugudu umwe utuwemo n’ingo zisaga 4000. Nk’uko umukozi ushinzwe irangamimerere mu murenge wa Runda Mwitiyeho Gratien abitangaza, ngo umukuru w’umudugudu na Komite ye y’abantu bane, ntibashobora kumenya amakuru ya buri rugo kuko akenshi abahatuye bazinduka bajya gukorera mu mujyi wa Kigali cyangwa mu tundi duce dutandukanye.

Kubera ubwo bucucike, ngo hagenda hagaragara ibibazo by’umutekano muke wiganjemo ubujura budasobanutse. Atanga ingero z’ubujura bukunze kuhagaragara, Mwitiyeho avuga ko hari abakodesha amazu barangiza bakayagurisha bayiyitirira cyangwa abasiga bakinze bagaruka bagasanga bibwe kandi bigaragara ko inzu zigikinze.

Uyu muyobozi ari nawe ushinzwe umutekano mu murenge wa Runda, asanga ibyo bibazo byakemurwa n’uko abaturanyi bakwishyira hamwe bagakora itsinda rituma bamenyana bakagira n’igihe cyo guhura bagahana amakuru.

Ubwinshi bw’abatuye ku Ruyenzi, butuma inzego z’ubuyobozi zitabasha kumenya amakuru kuri buri muturage uhatuye.

Ku ruhande rw’abakuru w’imidugudu bo, ngo bagira impungenge z’abantu baza gutura ntibiyandikishe, ibyo bigatuma mu bitabo bandikamo abaturage bigaragaramo umubare muto ugereranyije n’abatuye.

Habimana Jean Marie Vianney, umukuru w’umudugudu wa Kibaya avuga ko mu gitabo cy’abatuye umudugudu we handitsemo ingo 317, akaba ahamya ko izo ngo zirenga kuko hari abahimukira ntibiyandikishe.

Kubera gahunda y’amatsinda ya nyumbakumi bita “Kwigira System”, Habimana avuga bagenda bamenya abantu bashya baza gutura mu mudugudu, bakaboneraho no kubakangurira kwiyandikisha.

Intego ya mbere y’amatsinda amaze gukorwa ni ugukusanya amafaranga yo kwishyura ubwisungane mu kwivuza, bakaba bateganya no kwaguriramo ibindi bikorwa by’iterambere nko kwicungira umutekano no gushyigikira ibikorwa remezo.

Marie Josee Uwiringira