Izi nzu ebyiri zirimo iya Habiyambere Callixte, umusaza wacitse ku icumu utishoboye ufite umugore n’abana batatu ndetse n’iya Nyirabakungu Annonciata, umupfakazi wa Jenoside utishoboye ufite abana batanu.

Usibye izo nzu hari n’imyaka y’iyi miryango yari ihinze mu masambu yabo yangiritse icyakora Imana yakinze akaboko ntihagira icyo baba kuko ngo byari bikomeye nkuko bakomeza kubitangaza.

Umusozi warigise igice kimwe.

Abaturage twasanze hafi aho bari baje kureba uko uwo musozi wamanutse mu butaka bahakuye amasomo yo kwirinda gutura munsi y’imisozi cyangwa ahantu h’amanegeka nkuko babitangaza aho bavuga ko ibyo Leta ihora ibakangurira byo gutura heza basanga bifite akamaro.

Habiyaremye Janvier, umukozi w’akarere ka Rusizi ushinzwe imibereho myiza no gufasha abatishoboye yavuze ko nyuma yo gusura abahuye n’iki kiza bafashe ingamba zo gushakirwa amacumbi n’ibyo kubatunga mu gihe batarabona aho kuba ku bufatanye bw’inzego zose.

Inzu y’uwo musaza yangiritse cyane imbere ku buryo atakongera kuyibamo.

Aha habaye ikiza ngo hari ahantu hatuwe mu buryo burambye kuko abari batuye ahantu h’amanegeka muri uyu murenge bari barangije kwimurwa bose; akaba ari amuri urwo rwego ingo zihatuye zigera kuri 7 nazo zigomba kuzimurwa kugirango bitazatwarwa n’ibiza.

Nubwo izi nzu zitaguye nta wabasha kongera kuzibamo kuko imbere mu nyubako hangiritse cyane ku buryo imvura iramutse ikomeje kugwa zabagwaho kuko zashegejwe n’ibyo biza mu buryo bukomeye.

Musabwa Euphrem