Ikipe ya Sunrise umwaka ushize yari igiye kujya mu cyiciro cya mbere hakaburaho gato ubwo yasezererwaga muri ½ cy’irangiza itsinzwe na Esperance, kuri uyu wa gatandatu yatsinze Unity FC ibitego 2-0 mu mukino wabereye Kicukiro, bivuze ko ifite amahirwe menshi yo gukomeza muri 1/2, kuko yatsindiye hanze y’ikibuga cyayo.

Isonga FC yamanutse mu cyiciro cya kabiri umwaka ushize, nayo yateye intambwe yo kujya muri ½ cy’irangiza ubwo yatsindaga Interforce igitego 1-0. N’ubwo ayo makipe yombi abarizwa mu mugi wa Kigali yakiniye i Remera ku kibuga cya FERWAFA, Interforce niyo yari yakiriye Isonga FC.

I Kinihira, Ikipe ya SORWATHE yo mu ntara y’Amajyaruguru yari yakiriye Bugesera FC, ndetse inayitsinda igitego 1-0, naho umukino wahuje ikipe ya Vision Jeunesse Nouvelle na SEC Academy kuri Tam Tam, warangiye ari ubusa ku busa.

Imikino yo kwishyura izakinwa ku cyumweru tariki ya 27/4/2014, Sunrise FC ikina na Unity FC i Rwamagana, SEC Academy ikazakira Vision Jeunesse Nouvelle ku Kicukiro, Isonga ikazakina na Interforce ku kibuga cya FERWAFA, naho Bugesera ikazakira SORWATHE kuri Stade ya Kigali i Nyamirambo.

Muri ½ cy’irangiza, ikipe izakomeza hagati y’Isonga FC na Interforce, izahura n’izatsinda hagati ya SEC na Vision Jeunesse Nouvelle, naho izakomeza hagati ya Unity FC na Sunrise Fc ikazakina n’izaba yatsinze hagati ya SORWATHE na Bugesera FC.

Umwaka ushize, Esperance FC na Gicumbi FC nizo zazamutse mu cyiciro cya mbere nyuma yo kugera ku mukino wa nyuma mu cyiciro cya kabiri, zikaba zari zasimbuye Isonga FC na Etincelles zari zamanutse mu cyiciro cya kabiri, gusa Etincelles yo iza kuguma mu cyiciro cya mbere isimbuye La Jeunesse yari yamaze gusezera muri shampiyona.

Uyu mwaka, mu makipe afite ibyago byo gusubira mu cyiciro cya kabiri harimo Esperance yari yazamutse umwaka ushise, Amagaju ndetse na AS Muhanga ziri mu myanya itatu ya nyuma mu cyiciro cya mbere.

Theoneste Nisingizwe