Umuhanzi Boston kuri ubu akaba yiga muri Makerere Univertsity, aho yiga mu gihe cy’impera z’icyumweru avuga ko akiri muto yumvaga afite indoto yo kuzaba umwe mu bahanzi bakomeye kandi bibeshejeho.

Boston yaje gukora akazi ahantu hatandukanye nko ku karere ibiraka bitandukanye akajya abika amafaranga ye kugeza ubwo yishingiye inzu y’umuziki (studio) imuha amafaranga ku buryo abasha kubona amafaranga amushoboza kwirihirira kaminuza hanze y’igihugu. Boston avuga ko akoresha amadorari y’amerika arenga 500 ku mwaka y’amafaranga y’ishuri.

Yagize ati “nagize umuhate nkabika udufaranga nakoreraga buhoro buhoro, akaraka kose mbonye simfushe amafaranga nabonaga ubusa kugeza ubwo niguriye ibikoresho byose nkenerwa byo gukora studio yanjye inyinjiriza amafaranga”.

Boston avuga ko indirimbo imwe ayikorera amafaranga ibihumbi 30 iy’amashusho akayikorera amafaranga ibihumbi 60, gusa akaba agifite ikibazo cy’uko atarabona camera ye bwite , ariko nayo akavuga ko azayibona mu gihe cya vuba.

Boston avuga ko studio ye igezweho kandi ko izindi studio ntacyo zifite adafite cyane ko yanakorewemo n’abahanga mu gukora umuziki (producers) bazwi nka Dr Jaques, Dj Lil n’abandi.

Abisobanura agira ati “nyuma yo kwigishwa n’umuhanga mu gukora indirimbo witwa Chris Chita, nkakorana n’abantu bazwi bakomeye, n’ibyuma bigezweho, mbona ntacyo izindi studios ziri mu Rwanda zindusha uretse kuba zivugwa kurusha iyanjye.”

Boston avuga ko abona abakiriya benshi kuko buri munsi aba afite abo akorera gusa akaba atavuga ngo akorera bangahe ku munsi kuko gukora indirimbo bisaba umwanya ndetse n’imiterere ya buri ndirimbo.

Boston ngo afite indoto yo kugura mudasobwa yo mu bwoko bwa Mac ndetse akanagura ibikorwa bye akarenga akarere ka Nyamasheke.

Muri iyi studio ya Boston niho haririmbiwe indirimbo ya Nyamasheke all stas, indirimbo nka Ndagukumbura n’izindi. Iyi studio yitwa Boston Records ngo ihagaze amafaranga asaga miriyoni 3 z’amanyarwanda.

Umugwaneza Jean Claude