Ibi bintu bitemewe gucuruzwa mu Rwanda byose bifite agaciro k’amafaranga miliyoni 11 n’ibihumbi 400 byamenewe mu mudugudu wa Barija ya mbere akagali Barija umurenge wa Nyagatare tariki 16/04/2014.

Musabyimana Charlotte, umuyobozi w’akarere ka Nyagatare wungirije ushinzwe imibereho myiza avuga ko akarere kafashe ingamba ko umuyobozi w’umudugudu ibiyobyabwenge bizongera gufatirwa mu mudugudu ayobora azajya yeguzwa.

Gusa ngo n’ubukangurambaga ku bubi bwo gukoresha ibiyobyabwenge burakomeza ku baturage ariko ubu bukangurambaga ngo ntibukuraho ko ubifatanywe adashyikirizwa ubutabera ngo ahanwe.

Ndayambaje Theogene avuga ko ibi biyobyabwenge bitacika mu gihe birwanywa n’ubuyobozi n’inzego zishinzwe umutekano gusa abaturage ntibabigiremo uruhare. Umuti wo kubirandura ngo ni uguhanahana amakuru ku hantu bicururizwa no ku babicuruza bagahanwa.

Ibi biyobwenge by’inzoga zo mu mashashi zo mu bwoko bwa Chief na Zebra Waragi kimwe na Kanyanga byose bituruka mu gihugu cya Uganda gihana imbibe n’akarere ka Nyagatare.

Ibiti bya Kabaruka yo bicukurwa mu duce twegereye pariki y’akagera, mu turere twa Nyagatare, Gatsibo na Kayonza kimwe na Bugesera. Inzira ya Kabaruka ikaba ari Nyagatare kuko ariho biborohera kuyigeza mu gihugu cya Uganda.

Sebasaza Gasana Emmanuel