Umuvugizi w’ubushinjacyaha bw’u Rwanda Alain Mukurarinda, aravuga ko u Rwanda rwifuza ahanini inyandiko n’ibindi urukiko rwakoresheje mu manza rwaciye, cyane cyane ko ari amateka y’u Rwanda kandi zishobora kwifashishwa mu bintu bitandukanye bifitiye igihugu akamaro.

Umuvugizi w’Ubushinjacyaha bw’u Rwanda Alain Mukurarinda yongeye gushimangira ko u Rwanda arirwo rukwiye kubika inyandiko z’imanza zaciriwe Arusha

Yagize ati : “Izo nyandiko zifite akamaro cyane mu buryo butandukanye. Zishobora kwifashishwa n’abashakashatsi, abanyeshuri n’abandi babyifuza. Ikindi zikubiyemo imanza uru rukiko rwaciye zishobora kwifashishwa mu zindi manza, ibyo twita “jurisprudence” mu ndimi z’amahanga.

Uru rukiko rwari ruherutse gutangaza ko rwiteguye kwegurira u Rwanda isomero ryarwo riri mu mujyi wa Kigali, rizwi ku izina ry’Umusanzu w’Ubwiyunge. Imodoka y’umutamenwa yakoreshwaga n’abakozi b’iri somero yo izashyikirizwa urwego rushinzwe imfungwa n’abagororwa mu Rwanda.

Icyicaro cy’urukiko bise ICTR Arusha muri Tanzaniya

Hagati aho u Rwanda rwasabye ko rwakwegukana ububiko bw’uru rukiko, mu gihe ariko ngo hari n’ibindi bihugu byagaragaje ko byifuza gutwara ubwo bubiko, Mukurarinda avuga ko icyemezo kitarafatwa ariko bizera ko u Rwanda rushobora guhabwa umwanya wa mbere.

Ubwo aherutse mu Rwanda, umwanditsi mukuru w’uru rukiko Bongani Majola yagiranye ibiganiro n’umushinjacyaha mukuru wungirije w’u Rwanda Alphonse Hitiyaremye. Icyo gihe ubushinjacyaha bw’u Rwanda bwamusabye ko yazashyigikira icyifuzo cy’u Rwanda cyo kwegukana izo nyandiko.

Christian Mugunga