Iperereza ryakozwe na Polisi rigaragaza ko Bolsonalo yabeshye akagaragaza inyandiko mpimbano ko yakingiwe COVID-19 muri Nyakanga 2021, i Sao Paulo nyamara bigaragara ko icyo gihe atari muri uwo mujyi.

Polisi yatangaje ko hakurikijwe iryo perereza, Bolsonaro ashobora gushinjwa kuba yarabeshye amakuru y’ikigo cy’ubuzima muri Brazil (SUS) no gushinga umutwe w’abanyabyaha bari bagamije kudakurikiza amabwiriza y’ubuzima.

Raporo ya Polisi, igaragaza ko hari amakuru bakuye kuri Mauro Cid, umwe mu bahoze ari umuntu wa hafi wa Bolsonaro, nyuma yo gutabwa muri yombi muri Gicurasi ari gukorwaho iperereza ku byaha byo kuba yarabeshye amakuru ku gufata inkingo, nyuma akaza kurekurwa binyuze mu buryo bwo kumvikanisha Ubushinjacyaha n’uwakoze icyaha.

Polisi yasanze Cid yarakoresheje uburiganya bw’inyandiko mpimbano zigaragaza ko Perezida Bolsonaro n’umukobwa we Laura bakingiwe COVID-19. Ubuhamya bwa Cid, ubwo yireguraga bukaba bwakoreshejwe nk’ibimenyetso bishinja Bolsonaro kuko ibyo yakoze ari we wabimutegetse.

Bolsonaro yabwiye Reuters ko atigeze afata urukingo rwa COVID-19 cyangwa ngo akore amakosa ayo ari yo yose ndetse ko n’iperereza yakozweho ryakozwe riteguwe. Ati: "Nta kibi nakoze, iperereza ryakozwe ryarateguwe. Ndatuje. Isi izi neza ko ntigeze mfata urukingo."

Bolsonaro w’imyaka 66, waje kwandura COVID-19 yagiye yumvikana igihe kinini ahinyuza icyorezo cya COVID-19 ndetse akanenga na gahunda zagiye zishyirwaho zo kucyirinda zirimo no guhana intera hagati y’abantu n’abandi. Yagiye avuga ko Covid-19 ari indwara y’ibicurane byoroheje (little flu) maze ikabirizwa n’itangazamakuru.

Igihugu cya Brazil ni icya kabiri ku Isi mu byazahajwe na Covid-19 nyuma ya Leta Zunze Ubumwe za Amerika, aho icyo cyorezo cyahitanye abarenga ibihumbi 700.