Ubwo bari mu Kagoroba k’ababyeyi kitabiriwe n’abayobozi batandukanye, Twagirumukiza Innocent yafashe umwanya maze arega umugore we ubusinzi bukabije butuma agera ubwo arara aho atazi ndetse akanakora ibidakorwa bikaba bibangamiye umugabo we, abana ndetse n’abaturanyi.

Yagize ati: “Ubu ndakomerewe rwose, duhora dushyamiranye mu rugo biturutse ku businzi bw’umugore wanjye. Ikibazo nakigejeje ku buyobozi bw’inzego z’ibanze ariko bakiburiye umuti; cyakorwa ubwo kigeze ku bayobozi bakuru ndizera ko gikemuka.”

Afashe ijambo, Nyiranizeyimana Jacqueline yemeye ibyo aregwa byose, yivugira ko abiterwa n’inzoga, aboneraho gusaba imbabazi, yiyemeza ko aciye ukubiri na manyinya, kandi asaba ko abasenga bamusengera.
Ati: “N’ubu mundeba nyoye agakombe kamwe k’inzoga, ibyo nakora sinaba mbizi. Abasenga munsengere kuko aho bukera inzoga ziransenyera.”

Aba bayobozi ngo bazasura uyu muryango barebe ko amasengesho yakoze bahindutse urugo rubereye.

Umwe mu baturanye n’uyu muryango witwa Ikimpa Christian, yavuze ko uyu mugore ashobora kuba afite imyuka mibi, bitewe n’uko ngo iyo yasinze agira imbaraga zidasanzwe, akarara aho atazi bityo asaba ko mu miti yafatirwa iki kibazo n’isengesho ritaburamo.

Guverineri w’Intara y’Amajyaruguru yasobanuriye uyu muryango ko nta terambere wageraho bagishyamiranye, abereka ko umuti ari ugufata icyemezo cyo gukumira ubusinzi, asaba umugore ko yakwisubiraho maze umugore yemerera imbere y’imbaga ko aciye ukubiri n’inzoga.

Guverineri Bosenibamwe yasabye ko umukozi w’Imana yarambika ibiganza kuri uyu muryango, akabasabira ko amahoro yahinda mu rugo rwabo, abemerera ko nyuma y’ibyumweru bitatu azabasura akareba ko ibyo biyemeje babishyize mu bikorwa.

Minisitiri Oda Gasinzigwa ushinzwe Uburinganire n’iterambere ry’umuryango mu Rwanda yemereye uyu muryango kuzawusura nyuma y’ukwezi nawe akirebera ko ibyo biyemeje bari kubishyira mu bikorwa kandi abwira abari aho bose ko nta terambere ryagerwaho umugabo n’umugore batabanye neza.

Jean Noel Mugabo