Imibare Billboard yahawe na sosiyete Meta, ifite urubuga rwa Instagram igaragaza ko Doja Cat yatakaje abafana bangana na 237,758 kuri Instagram, nyuma yo guterana amagambo na bo.

Mu ruhererekane rwa post ku mbuga za Twitter na Threads, Doja Cat yateranye amagambo n’umwe mu bafana be wari utanze igitekerezo cy’izina ribereye itsinda ry’abakunzi be.

Ikinyamakuru Pulse Nigeria kivuga ko guterana amagambo kwa Doja Cat n’abafana be, byaturutse kuri umwe watangaga igitekerezo ku mazina yumva yakwitwa itsinda ry’abakunzi be.

Uwo mufana yavuze ko mu mazina menshi atandukanye yumva bahitamo rimwe muri ’Kitten’ cyangwa ’kittenz’, gusa ariko uyu muhanzikazi ntabwo yabyishimiye.

Uyu muraperikazi yahise abasubiza agira ati "Abakunzi banjye ntabwo bajya biyita amazina mabi nk’ayo aho gukora ibyo mukwiye gushyira hasi Telefone zanyu, ahubwo mugafasha ababyeyi banyu imirimo yo mu rugo."

Doja Cat ntabwo byarangiriye aho, kuko yashwanye n’undi mufana wamubajije niba koko akunda abafana be.

Agira ati "Ndashaka kumva uvuga ngo (Ndabakunda) nk’uko buri gihe uhora ubibwira abafana bawe."

Doja Cat maze amusubiza agira ati "Sinabikora kuko n’ubundi ntabazi mwese, ku buryo naba mbakunda."

Umwe mu bafana be yahise amwandikira ubutumwa burebure amusubiza amwibutsa ko atari kuba uwo ari we uyu munsi iyo bitaba ku bw’abafana be, ndetse amubwira ko abatengushye muri rusange bitewe n’uburyo abafata.

Doja Cat wakomeje kutavugwaho rumwe na benshi, muri ino minsi akomeje kugaragaza ko nta kintu na kimwe kikimushishikaje harimo n’abafana be.