The Ben ubwo yakirwaga ku kibuga cy’indege i Kanombe

The Ben, ubundi witwa Mugisha Benjamin, yageze ku kibuga cy’indege cya Kanombe ku i saa 11h30, ku wa gatandatu tariki ya 24 Ukuboza 2016.

Aje gutaramira Abanyarwanda, mu gitaramo cyitwa "East African Party", gitetanyijwe kuba tariki ya 01 Mutarama 2017.

The Ben akigera i Kanombe yakiriwe na nyirakuru barahobera biratinda

Ubwo yari akigera ku kibuga cy’indege cya Kanombe yakiriwe n’abantu batandukanye barimo nyirakuru wamwakiranye urugwiro amuhobera, ibyishimo birabataha bombi bararira.

Hari n’abandi bari baje kumwakira bambaye imipira yanditse izina rye n’andi magambo amwifuriza ikaze. Banamuhaye indabo z’amaroza bigaragaza uburyo bamwishimiye.

The Ben yabwiye abari bari aho ko yishimye cyane kubera uburyo bamwakiriye. Gusa ariko yizeza abakunzi be ko mu gitaramo cya "East African Party" nawe yiteguye kubashimisha.

The Ben yakandagiye ku butaka bw’u Rwanda, nyuma y’imyaka itandatu yari amaze aba mu Amerika. Yavuye mu Rwanda mu mwaka wa 2010.

Icyo gihe yari mu bahanzi bari bakunzwe mu Rwanda. Kuri ubu kandi nabwo aracyafite abakunzi benshi mu Rwanda nubwo atahaba.

Ubwo yari ari muri Amerika yakomeje gushaka uburyo yagaruka mu Rwanda ariko bikamwangira ngo kubera inzitizi z’amasomo yari afite yagombaga kurangiza.

Andi mafoto

Akigera ku kibuga cy’indege

Ubwo imodoka zatwaye The Ben zavaga ku kibuga cy’indege i Kanombe

Amaze kuva ku kibuga cy’indege

Abafana ba The Ben baje kumwakira bambaye imipira yanditseho amazina ye n’andi magambo amuha ikaze

Amafoto: Batamuriza Natasha na Richard Kwizera

Video: Sesonga Junior