KT TV
Umwe mu bahatanaga na Ingabire Habiba yituye hasi none byakuruye impaka (Video)
Mu birori byo gutangaza uwegukanye ikamba rya Miss Supranational 2017, Miss Peru witwa Lesly Reyna yituye hasi hitabazwa abaganga bo kumwitwaho.
Ibyo birori by’iryo rushanwa, ryitabiriye na Ingabire Habiba wari uhagarariye u Rwanda, byabereye muri Polonye ku itariki ya 01 Ukuboza 2017.
Gusa ariko ubwo ibyo birori byabaga, ababireberaga kuri Tereviziyo no kuri “Facebook Live” ntibabonye uwo Nyampinga yitura hasi.
Video imugaragaza agwa, yafashwe n’umwe mu bitabiriye icyo gitaramo maze ayishyira ku mbuga nkoranyambaga.
Iyo video yerekana ko ubwo bageraga mu gice cyo gutangaza ba Nyampinga batanu ba mbere ari bwo Miss Peru, waje muri 25 ba mbere, yituye hasi maze bagenzi be bakamuterura bakamujyana inyuma na bwo akongera akagwa.
Muri iyo video imara umunota umwe, igaragaza ko Nyampinga wo mu gihugu cya Philippines witwa Chanel Olive Thomas yahise yiruka ajya guhamagara abaganga ngo baze kwita kuri Miss Peru.
Ubwo ibyo byose byabaga ariko igitaramo cyakomeje kuba kugeza bambitse ikamba uwegukanye irushanwa ry’ubwiza rya Miss Supranational 2017 ari we Jenny Kim wo muri Korea y’Epfo.
Ababonye iyo video bababajwe no kubona Miss Peru yitura hasi ariko umwe muri ba Nyampinga bari bahagararanye agakomeza guhagarara ntacyo bimubwiye mu gihe abandi bari bahangayitse bari kumuterura, bamwitaho.
Abarebye iyo video bagaragaje ko byabababaje cyane bibaza uwo Nyampinga utagira umutima wo gutabara mugenzi we wari uri mu bibazo.
Hari abahise bavuga ko ari Nyampinga wo muri Sudani y’Amajyepfo witwa Teresa Anyier Yual. Uyu Nyampinga ariko yaje kubihakana abinyujije ku mbuga nkoranyambaga.
Agira ati “Uwo Nyampinga si jye. Simvuga uwo ari we ariko si jye kuko nari ndi kure ya Nyampinga wo muri Peru wituye hasi.”
Haje kumenyekana ko ari Miss Namibia wakomeje kwihagararira mu gihe abandi bari gutabara mugenzi wabo. Kuri ubu ariko ngo Miss Peru ameze neza.
Hari andi makuru aturuka mu irushanwa rya Miss Supranational 2017 avuga ko impamvu Miss Peru yaguye byaba byaraturutse ku kunanirwa kuko ngo ba Nyampinga bari bamaze iminsi bakora imyitozo myinshi bataruhuka bihagije.
Ibitekerezo ( 1 )
Ohereza igitekerezo
|
|
jyew ndumva ata mu miss w’ishyari nkuwo nguwo,gusa biragoy cyan kko ntamubi wabona ariko k’umutima ni danger.