Abatoza 30 barimo 17 b’Abanyarwanda kongeraho abatoza 13 bavuye mu bihugu nka Tanzania, Kenya, Burundi na Uganda ni bo batangiye aya mahugurwa ku mukino wa Tennis ku bibuga bya Hotel Novotel, aho bahabwa mahugurwa n’impuguke zoherejwe n’Ishyirahamwe mpuzamahanga ry’umukino wa Tennis (ITF).

Umuyobozi Ushinzwe iterambere muri ITF mu Karere k’Afurika y’i Burasirazuba, Ntwari Thierry avuga ko aya mahugurwa bayateguye mu rwego rwo guteza imbere umukino wa Tennis mu mashuri mato, muri gahunda ya STI na PTI mu bihugu byo mu Karere k’Afurika y’i Burasirazuba.

Ntwari yakomeje avuga ko aya mahugurwa agamije kongerera abatoza ubumenyi muri iyi gahunda kuko aribo bazagira uruhare rugaragara mu ishyirwa mu bikorwa ry’iyi gahunda igamije guteza imbere umukino wa Tennis mu mashuri mato. Ikindi ni uko aya mahugurwa azafasha abatoza kandi mu gushimangira gahunda zigamije guteza imbere umukino wa Tennis mu bihugu bigize akarere k’Afurika y’i Burasirazuba muri rusange.

Afungura aya mahugurwa Perezida wa Komite y’imikino Olempike mu Rwanda (CNOSR), Colonel Charles Rudakubana yavuze ko Komite Olempike izakomeza gushyigikira gahunda zigamije guteza imbere siporo mu Rwanda, by’umwihariko Ishyirahamwe rya Tennis rirasabwa gukora gahunda igamije guteza imbere umukino wa Tennis mu bana bakiri bato, kugira ngo abatoza barusheho gushyigikirwa, bashyikirizwa ibikoresho bikenerwa mu mukino wa Tennis.

Egide Kayiranga