Nyuma y’iminsi ari mu biruhuko mu gihugu cye cy’amavuko cya Brazil, umutoza Roberto Oliveira Gonçalves do Carmo uzwi nka Robertinho, biteganyijwe ko azagaruka mu Rwanda nyuma y’igikombe cy’Amahoro, aho azaba aje gutegura igikombe cya CECAFA.

Robertinho wahesheje Rayon Sports igikombe cya Shampiyona agiye kongera kuyitoza undi mwaka

Mu kiganiro KT Radio yagiranye na Perezida wa Rayon Sports Paul Muvunyi, yadutangarije ko bamaze kumvikana n’uyu mutoza mukuru wa Rayon Sports, ko azaza nyuma y’igikombe cy’amahoro, akaza azanye n’abakinnyi babiri bakomoka muri Brazil.

Yagize ati “Ibijyanye n’amasezerano na Robertinho twamaze kubyumvikana igisigaye ni ukuzaza aje gusinya, twavuganye ko azaza agategura CECAFA, noneho n’umutoza Do Nascimento nawe akabona gufata ikuruhuko”

Uyu mutoza akomeje kwishimana n’umuryango we muri Brazil

Umutoza Robertinho yavuye mu Rwnda nyuma yo kwegukana igikombe cya Shampiyona cy’uyu mwaka, ubu ikipe ye ya Rayon Sports ikaba iri gutozwa na Wagner do Nascimento mu gikombe cy’amahoro, aho amaze no kuyigeza muri ½ cy’irangiza.