Ibi Umukuru w’Igihugu yabitangaje ubwo yaganiraga n’itangazamakuru, umwana witwa Manishimwe Gilbert ahamagara ku murongo wa telefone avuganira abana babura uko bagaragaza impano ndetse n’abagera aho zitoranyirizwa ntibatoranywe kubera uburiganya, amusaba ko yazabikurikirana kuko bamwizera.

Yagize ati “Nyakubahwa, abashinzwe amarushanwa muri ruhago no mu yindi mikino ntabwo bagera mu cyaro bitewe n’aho ari ho hakaba hari abana impano zidindira kuko babuze ababakurikirana, nkaba nifuza ko bakurikiranwa. Ikindi kibazo, Nyakubahwa hari ukuntu haba amarushanwa runaka(yo gutoranya impano) bakajyamo ugasanga batsinze ariko kuko umuryango uvukamo utifashije ugasanga umwanya wawe uragurishijwe. Nyakubwaha turifuza ko ibyo bintu byajya bikurikiranwa kuko twizeye ubushobozi bwanyu.”

Kuri ibi byifuzo, Umukuru w’Igihugu yavuze ko hazakorwa ibishoboka byose ngo bicyemuke.

Ati “Byose byumvikanye nabyumvise neza tuzabikurikirana.Ibyo uvuga ni byo, wizere ko ibishobora gukorwa byose bizakorwa kugira ngo ibibazo bicyemuke.”

Ni kenshi hirya no hino humvikana abavuga ko mu itoranywa ry’impano mu mikino itandukanye hatabamo ukuri kuko abana bakwiriye kujya mu bigo bizamura impano zabo badahabwa ayo mahirwe kandi bagaragaje ubushobozi, ahubwo agahabwa abatabikwiriye, bitwaje ubushobozi baba bafite cyangwa ibibasunika bitari impano zabo. Urugero ruheruka ari ibyavuzwe mu itoranywa ry’abana bari bagiye mu irerero rya Bayern Munich, byatumye hari n’abakurikiranwa n’inzego z’ubutabera.