Liverpool yarangije imikino 19 ibanza iyoboye urutonde rwa Shampiyona

Ni imikino ibanza yarangiye isize isura y’uko ari shampiyona itazoroha ku makipe arwanira igikombe ariko nanone no mu makipe arwana no kutamanuka. Ku munsi wa 19 wa shampiyona, ikipe ya Liverpool yatsinze Burnley 2-0, Man City itsinda Everton 3-1 mu gihe Arsenal yasoje itsinzwe na Westham United 2-0.

Aya makipe yose ni na yo ahabwa amahirwe yo kuzegukana igikombe cya shampiyona kuko iyo urebye uko ari kwitwara ndetse n’uko ahagaze ari ho bishya bishyira. Iyo utanga ayo mahirwe kandi unagendera ku buryo shampiyona ya 2022-2023 yagenze kuko icyo gihe ikipe ya Man City yayegukanye yari ihanganye na Arsenal yabaye iya kabiri n’ubu ziri mu zihabwa amahirwe.

Gusa ukurikije uko igice cya mbere cya shampiyona ya 2023-2024 cyagenze mu makipe yari ahanganye umwaka ushize, hiyongereyemo ikipe ya Liverpool yo shampiyona ya 2022-2023 itari yarahiriwe kuko itigeze iza no mu makipe ya mbere kuko yari yasoreje ku mwanya wa gatanu, byatumye itari gukina UEFA Champions League 2023-2024.

Kuvuga ko Liverpool, Arsenal na Man City zihabwa amahirwe ntabwo ari ukurengera kuko ukurikije uko imikino 19 irangiye yagenze ari yo aza imbere mu mibare igaragara. Ikipe ya Liverpool kugeza ubu ni yo iyoboye urutonde rwa shampiyona aho ifite amanota 42. Iyi kipe mu mikino 19 yinjije ibitego 39 mu gihe yo yinjijwe ibitego 16 gusa.

Arsenal isoje imikino ibanza iri ku mwanya wa kabiri

Liverpool mu mikino ibanza 19 yakinnye yatsinzemo imikino 12 inganya itandatu(6) itsindwa umukino umwe gusa. Arsenal ni yo kipe iri ku mwanya wa kabiri nyuma y’igice cya mbere cya shampiyona aho ifite amanota 40 yose yakoreye itsinda imikino 12 inganya ine(4) ariko itsindwa imikino itatu(3). Muri iyi mikino 19 iyi kipe ikunda guhimbwa ‘Abarashi’ yinjije ibitego 36, yo yinjizwa ibitego 16.

Mu mikino 19 imaze gukinwa muri shampiyona y’u Bwongereza, gutungurana kwabaye ni ukuba kugeza ubu ikipe ya Aston Villa iri mu makipe ane ya mbere, dore ko iri ku mwanya wa gatatu aho ihafite amanota 30. Mu mikino 19 iyi kipe yatsinzemo 12 inganya imikino itatu itsindwa ine. Iyi kipe itozwa na Unai Emery watunguye abantu, yinjije ibitego 40 ariko na yo yinjizwa ibitego 25. Iyi kipe ifatwa nk’izagorana muri uyu mwaka nk’uko Newcastle United yabikoze mu mwaka ushize wa 2022-2023 iba iya kane.

Man City ibitse ibikombe bitatu biheruka, mu mikino 18 ifite amanota 37 ayishyira ku mwanya wa kane n’amanota 37

Nubwo ari yo iheruka gutwara shampiyona eshatu ziheruka ariko imikino ibanza ya shampiyona iyisize mu mwanya itakwifuza kubamo kuko Man City kugeza ubu iri ku mwanya wa kane n’amanota 37 gusa yo ikaba imaze gukina imikino 18 kuko ifite umukino w’ikirarane izakina na Brentford. Iyi kipe mu mikino 18 imaze gukina yatsinzemo 11 inganya ine(4) itsindwa imikino itatu(3). Nubwo ari iya kane ariko iyi ni yo kipe imaze kwinjiza ibitego byinshi muri rusange kuko yatsinze 43 ariko yinjizwa na yo 21.

Nubwo amakipe ahagaze gutya by’umwihariko abahabwa amahirwe ku gikombe, ariko iteganyagihe rigaragaza ibindi

Binyuze mu guteganya uko amakipe ashobora kuzarangiza shampiyona, iri teganyagihe rigaragaraza ko ikipe ya Man City ifite amahirwe angana na 48.2% yo kuba yakwegukana igikombe cya shampiyona, Arsenal kuba yatwara igikombe ikagira amahirwe abarirwa kuri 25.1% naho Liverpool kugeza ubu iyoboye shampiyona ikaba ihabwa amahirwe yo kuzarangiza itwaye igikombe angana 24.1% nk’uko tubikesha urubugwa rukora isesengura ritandukanye rwa https://theanalyst.com/eu/2023/12/who-will-be-relegated-from-the-premier-league-2023-24/ .

Manchester United na Chelsea zakomeje mu nzira itandukanye n’aho zifuza

Amakipe ya Manchester United n’ikipe ya Chelsea ntabwo ari amakipe yahiriwe n’imikino ibanza ya shampiyona y’u Bwongereza 2023-2024 kuko kugeza ubu imyanya ariho idahura n’uko abakunzi bazo bazifuza. Ikipe ya Manchester United imikino 19 imaze gukina iyisoje iri ku mwanya wa karindwi n’amanota 31 aho muri iyo mikino yatsinzemo 10 inganya umwe itsindwa umunani, yinjiza ibitego 21, yinjizwa 25 ikaba ifite umwenda w’ibitego bine.

Abafana ba Manchester United basabwe n’umushoramari mushya kwihangana

Iyi kipe ifite ibikombe byinshi bya shampiyona y’u Bwongereza 20 umusaruro mubi yagize wagiye ugarukwaho mu bihe bitandukanye. Iyi kipe ariko kuva mu Ugushyingo 2022 yavugwaga ko izagurishwa dore ko umusaruro mubi igira ushyirwa ku muryango wa ba Glazer uyifite mu maboko. Tariki 24 Ukuboza 2023 uyu muryango watangaje ko umunyemari w’Umwongereza Sir Jim Ratcliffe yamaze kugura 25% muri iyi kipe agashingwa ibikorwa byose bifitanye isano n’umupira w’amaguru.

Manchester United iri ku mwanya wa karindwi mu gice cya mbere cya shampiyona y’u Bwongereza kimaze gukinwa

Uyu Mwongereza witezweho kugarura iyi kipe ku gasongero, yabwiye abakunzi bayo ariko ko intsinzi isaba kwihangana.

Ati “Nizeye ko twazana intsinzi mu kibuga nk’uko dufite ubunararibonye budashidikanywaho mu bucuruzi. Bisaba igihe, kwihangana ndetse no gukora kinyamwuga byo ku rwego rwo hejuru.Turi mu mushinga w’igihe kirekire kandi turashaka gufasha Manchester United gusubira aho yahoze, ku gasongero mu Bwongereza, mu Burayi ndetse no ku Isi. Izo ni inshingano nkomeyeho cyane.”

Ikipe ya Chelsea na yo ni indi kipe itarahiriwe n’imikikino 19 ibanza imaze gukinwa muri shampiyona. Iyi kipe iri ku mwanya wa 10 n’amanota 25 aho muri iyo mikino yatsinzemo irindwi(7) inganya ine(4) itsindwa umunani(8). Iyi kipe muri rya teganyagihe ryakozwe ry’uko amakipe ashobora kuzarangiza shampiyona, nyuma yo kutaza mu makipe ane ya mbere 2022-2023 n’ubu ntihabwa amahirwe yo kuyazamo kuko amahirwe yayo abarirwa munsi ya zeru.

Umutoza wa Chelsea Mauricio Pochettino nyuma yo gutsinda Crystal Palace 2-1 hasozwa imikino ibanza, yavuze ko intego zabo zari ukuza mu makipe y’imbere.

Chelsea iri ku mwanya wa 10 mu mikino 19 imaze gukina aho abakunzi bayo batifuza ko yaba iri

Yagize ati “Intego yacu kwari ukuba hejuru.”

Iyi kipe mu mikino 19 yinjije ibitego 31 itsindwa 29 ikaba izigamye ibitego bibiri gusa. Mu makipe ari mu myanya ya nyuma, Luton Town FC iri ku mwanya wa 18 n’amanota 15 igakurikirwa na Bunley ya 19 n’amanota 11 mu gihe Sheffield United ari iya nyuma ku mwanya wa 20 n’amanota icyenda.

Igice kibanza cya shampiyona y’u Bwongereza cyasojwe Erling Halaand wa Man City ari we uyoboye abamaze gutsinda ibitego byinshi aho afite ibitego 14 mu gihe akurikiwe na Mohamed Salah wa Liverpool umaze gutsinda ibitego 12.

Imikino yo kwishyura iratangira gukinwa kuri uyu wa Gatandatu aho Nottingham Forest iyitangira yakira Manchester United saa moya n’igice, Manchester City yakire Sheffield United ya nyuma saa kumi n’imwe mu gihe Luton Town FC saa munani n’igice itangira yakira Chelsea.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 744 )