Amakipe 32 arimo Arsenal yari imaze imyaka 6 idakina Champions League na Newcastle yari imaze imyaka 20 ni yo yagabanyijwe mu matsinda umunani aho buri rimwe rigizwe n’amakipe ane. Muri iki cyiciro nta makipe abiri aturuka mu gihugu kimwe yari yemerewe kuba yatomborana.

Iyi tombola yasize mu itsinda rya mbere hahuriyemo amakipe abiri akomeye ari yo Bayern Munich yo mu Budage ndetse na Manchester United yo mu Bwongereza aho ari hamwe na FC Copenhagen yo muri Denmark na Galatasaray yo muri Turkey.

Bayen Munich muri iyi mpeshyi yaguze rutahizamu Harry Kane ukomoka mu Bwongereza aho azongera guhangana na Manchester United yo ku ivuko kandi yanamwifuje ariko Tottenham Hotspurs yakiniraga ikamubima.

Mu itsinda rya kabiri harimo ikipe ya Arsenal yabaye iya kabiri muri shampiyona y’u Bwongereza 2022-2023. Iyi kipe hari hategerejwe itsinda ryayo kuko nyuma y’imyaka 6 ari ubwa mbere igarutse muri iri rushanwa yaherukaga gukina mu mwaka w’imikino wa 2016-2017. Arsenal iri kumwe na Lens yo mu Bufaransa, PSV yo mu Buholandi na FC Sevilla yo muri Espagne aho abakunzi bayo benshi bavuze ko bishoboka ko bazarivamo bakagera muri 1/8.

Newcastle United yabaye iya kane mu Bwongereza mu mwaka ushize w’imikino ni ikipe yari imaze imyaka 20 idakina iri rushanwa kuko yaherukaga mu mwaka w’imikino wa 2003-2004. Iyi kipe iri kwiyubaka ngo yongere ibe igihangange ariko yisanze mu itsinda rya gatandatu ryiswe iry’urupfu kuko iri hamwe na PSG yo mu Bufaransa, Milan AC yo mu Butaliyani yageze muri ½ umwaka ushize ndetse na Dortmund yo mu Budage, bityo benshi bakavuga ko bizayisaba akazi gakomeye ngo igaragare mu makipe abiri azagera muri 1/8.

Ikipe ya Man City iheruka gutwara iki gikombe mu mwaka w’imikino ushize, ku nshuro ya mbere yo yisanze mu itsinda rya karindwi aho iri hamwe n’ikipe ya Leipzig yo mu Budage, Crvena Zvezda na Young Boys. Mu yandi matsinda ikipe ya FC Barcelona iyoboye rya munani naho mukeba wayo Real Madrid ikayobora itsinda rya gatatu aho iri hamwe na Napoli SC yageze muri ½ umwaka ushize mu gihe Atletico Madrid na yo yo muri Espagne yo iri mu itsinda rya gatanu.

Amatariki y’ingenzi muri UEFA Champions League 2023-2024:

Imikino y’umunsi wa mbere w’amatsinda izakinwa hagati ya tariki 19 na 20 Nzeri 2023 isozwe hagati ya tariki 12 na 13 Ukuboza 2023. Imikino ibanza ya 1/8 iteganyijwe hagati ya tariki 13 na 14 ndetse na 20 na 21 Gashyantare 2024 mu gihe iyo kwishyura izakinwa hagati ya tariki 5 n’iya 6 na 12 na 13 Werurwe 2024.

Imikino ibanza ya ¼ izakinwa hagati y’itariki 9 na 10 Mata 2024 naho iyo kwishyura ikinwe tariki 16 na 17 Mata 2024. Imikino ibanza ya ½ yo izakinwa tariki ya 30 Mata 2024 n’iya 1 Gicurasi 2024 naho iyo kwishyura ikinwe tariki ya 7 n’iya 8 Gicurasi 2024 mu gihe umukino wa nyuma uzakinwa tariki 1 Kamena 2024 kuri stade ya Wembley mu Bwongereza.

Uko amakipe agabanyije mu matsinda: