Muri ayo makipe agize icyiciro cya mbere, amwe bitewe n’ubushobozi yo yanatumiye amakipe yo hanze y’igihugu cy’u Rwanda mu rwego rwo kwipima ngo barebe aho u rwego rwabo rugeze.

Amakuru yizewe agera kuri Kigali Today aravuga ko ikipe ya Police FC yari maze iminsi mu mwiherero mu karere ka Rubavu, izakina nayo imikino ya gicuti ibiri n’amakipe yo hanze y’u Rwanda.

Muri ayo makipe harimo ikipe ya Le Messager de Ngozi yo mu gihugu cy’u Burundi isanzwe ikina mu cyiciro cya mbere muri iki gihugu, ndetse na Geita Gold yo muri Tanzania dore ko yo inafitanye umukino wa gicuti na Mukura Victory Sports mu isabukuru yayo y’imyaka 60.

Ikipe ya Police FC y’umutoza Mashami Vincent, yari imaze iminsi mu ntara y’i Burengerazuba mu karere ka Rubavu mu mwiherero wo kwitegura shampiyona aho kuri uyu wa mbere ikipe yagarutse i Kigali.

Ikipe ya POLICE FC ni imwe mu makipe yiyubatse muri iyi mpeshyi nyuma yo kongeramo izindi mbaraga izana abakinnyi bashya dore ko kuri iyi nshuro yanongeye kugura abakinnyi b’abanyamahanga.

Bamwe muri abo bakinnyi ikipe ya POLICE FC yaguze muri iyi mpeshyi harimo Nyamurangwa Moise bakuye mu ikipe ya Sunrise, Kwitonda Ally bakuye mu ikipe ya AS Kigali, Ndizeye Samuel wavuye muri Rayon Sports, Bigirimana Abedi na Mugenzi Bienvenue bombi bakiniraga ikipe ya Kiyovu Sports, ndetse na Rukundo Onesime wakiniraga Le Messager Ngozi.

Nk’uko amakuru agera kuri Kigali Today abivuga, biteganyijwe ko umukino wa mbere Police FC izawukina na Geita Gold tariki ya 06 Kanama i Kigali gusa iyi kipe izaba yaraye ikinnye na Mukura victory Sports.

Biteganyijwe ko kandi umukino wa kabiri ikipe ya Police FC izacakirana na Le Messager Ngozi tariki ya 10 Kanama kuri Kigali Pele Stadium.

Police FC yasoje ku mwanya wa 5 muri shampiyona y’umwaka wa 2022-2023.