Mu Karere ka Gicumbi aho umuganda wabereye ku rwego rw’Intara y’Amajyaruguru, abawitabiriye bafatanyije gusana ibiraro by’umuhanda uhuza Imirenge ya Byumba, Rukomo, Bwisige na Rushaki y’ako Karere ka Gicumbi, ukaba ukomereza mu Karere ka Gatsibo.

Abaturage bo mu Kagari ka Nyabushingi mu Murenge wa Bwisige, barimo Nizeyimana uvuga ko imihahirane hagati yabo n’abandi ibagora kubera imiterere y’ibiraro byari byarangiritse.

Ati “Ino aha imvura iyo iguye kubera imisozi miremire yaho, imanukana ibitengu n’amazi menshi bikangiza ibiti byubakishije ibiraro, bigahirima kubyambukiranya ntibibe bigishoboka.

Ati “Nk’ahantu hagendwa na benshi, barimo n’imodoka ziza gutunda amakara, ibiti n’imbaho kuko ino aha hari amashyamba menshi, moto n’imodoka ntoya hari aho zigera ntizibashe kuharenga kubera ayo mateme yangiritse. Mu by’ukuri nta muntu utugenderera, abana bacu bajya ku ishuri bakabigwamo; inzego z’ubuvuzi cyangwa ubuyobozi iyo tuzitabaje ntizitugereraho ku gihe kubera ibi biraro bidafututse. N’ubwo dukoze umuganda tukaba tuhashyize ibindi biti bishya, bigiye kuduhuhiramo ariko nanone hakenewe igisubizo kirambye”.

Minisitiri Musabyimana mu butumwa bwe yagaragaje akamaro k’ubufatanye binyuze mu bikorwa nk’ibi by’umuganda, abizeza ko igisubizo kirambye kizaboneka.

Ati “Ubuyobozi bubatekerezaho umunsi ku munsi, kandi ntabwo bwicaye kuko bukomeje gukorana bya hafi n’abafatanyabikorwa b’Igihugu mu kubaka amateme agezweho. Na hano rero bizahagera”.

Yanakanguriye abaturage kurangwa n’imyitwarire igendera kure ibiyobyabwenge n’ubusinzi, kuko kenshi ababyishoramo aribo bahindukira bakangiza ibyagezweho.

Mu Karere ka Gakenke, abaturage bitabiriye umuganda bifatanyije mu gutunganya imigende iyobora amazi mu gishanga cya Gashenyi, kiri ku buso bwa Ha 65. Iki gishanga giherereye mu Mudugudu wa Busaro Akagari ka Taba mu Murenge wa Gashenyi, ubuso bunini bw’ubutaka bwaho muri kino gihembwe cy’ihinga, bwahujwe ku gihingwa cy’ibishyimbo bigufi, kikaba kimwe mu byihanganira ikirere n’ubutaka byo muri kano gace, n’ubwo rimwe na rimwe haba ubwo imvura igwa ari nyinshi ikangiza imyaka iba igihinzemo.

Manirakiza Elisa agira ati “Mu mwaka ushize mu gihe cy’imvura yo mu kwa cyenda iki gishanga cyibasiwe n’ibiza, bishegesha imyaka yari ihinzemo dusigara tutagifite icyizere kweza. Dushimira ingamba zafashwe mu gukumira ibyo biza none ziyongereyeho no gutunganya iyi migende y’amazi akinyuramo. Izi mbaraga zihashowe natwe tugiye gushyiraho akacu tuhabungabunge kugira ngo bizadufashe kweza umusaruro ufatika”.

Brig. Gen Nelson Rwigema ukuriye Ingabo mu Ntara y’Amajyaruguru, wari hamwe n’Umuyobozi w’Akarere ka Gakenke, Mukandayisenga Vestine, mu butumwa aba bombi bagarutseho bwibanze ku kwibutsa abaturage uruhare rwabo mu gushyigikira iterambere, by’umwihariko barushaho kubungabunga umutekano no kwirinda amakimbirane.

Mu Karere ka Burera ho abaturage n’abayobozi bafatanyije gutunganya umuhanda ugana muri Site y’imiturire ya Rutuku, iri mu Kagari ka Kabona mu Murenge wa Rusarabuye. Ni site nshya yahanzwe mu rwego rwo kunoza igishushanyo mbonera ikaba yegereye ahari ibiro bishya by’Akarere ka Burera.

Uwo muhanda ureshya na Kilometero ebyiri, abaturage bawufata nk’igisubizo kizorohereza abagomba kuyituramo.

Muri utu turere twose, mu biganiro byagarutsweho nyuma y’umuganda, byibanze ku gushishikariza abaturage kwimakaza umuco w’isuku, kurangwa n’umurimo unoze no kwitegura neza amatora y’Umukuru w’Igihugu n’ay’Abadepite ateganyijwe muri Nyakanga 2024.