Basketball: Ikipe ya APR BBC yageze i Doha Muri Qatar

Yanditswe na

Amon B. Nuwamanya

20-02-2024 - 10:17' | Ibitekerezo ( )

Ku mugoroba wo ku wa Mbere tariki 19 Gashyantare 2024, nibwo ikipe ya APR y’umukino wa Basketball mu bagabo (APR BBC), yahagurutse i Kigali yerekeza i Doha mu gihugu cya Qatar, aho igiye gukorera umwiherero mu rwego rwo kwitegura neza imikino ya BAL 2024.

Ikipe ya APR BBC yageze i Doha Muri Qatar

Mu rucyerera rwo kuri uyu wa kabiri ahagana saa kumi n’imwe n’iminota 50, nibwo aba basore basesekaye mu mujyi wa Doha aho bahise berekeza kuri Hotel ya THE GRAND LUX HOTEL DOHA, ari na yo iyi kipe icumbitsemo mbere yuko batangira imyitozo nyirizina muri iki gihugu.

Biteganyijwe ko ikipe ya APR BBC izamara iminsi 10 muri iki gihugu, aho izakina imikino 5 ya gicuti n’amakipe atandukanye mu rwego rwo kwipima no gukomeza kwitegura neza irushanwa rya BAL 2024, izaba igiye gukina ku nshuro yayo ya mbere.

Ikipe ya APR Basketball Club yerekeje muri Qatar, ibaye isubitse imikino yayo ya shampiyona irimo kujya mbere, gusa ikaba igiye imaze gukina imikino 2 harimo uwo yatsinzemo KEPLER BBC amanota 98 kuri 67, ndetse n’uwo batsinzemo Inspired Generation amanota 93 kuri 52.

Ikipe ya APR BBC yahagurukanye na RwandAir

APR BBC kandi imaze igihe yitegura iyi mikino ya BAL 2024, izatangira gukinwa mu matsinda (Conferences) guhera mu kwezi gutaha kwa Werurwe muri Afurika y’Epfo, muri conference yiswe ‘Kalahari conference’, imikino izakinirwa muri SunBet Arena mu mujyi wa Pretoria.

Ikipe ya APR Basketball Club mu rwego rwo kwitegura neza, yongeyemo imbaraga mu bakinnyi aho yazanye abakinnyi bashya nk’Abanyamerika Zion Styles, Michael Dixon na Dario Nathan Henry Hunt, aba bakaba baraje biyongera ku bandi bakinnyi beza iyi kipe isanganywe nka Adonis Filer, Azel Mpoyo n’abandi.

Ikipe ya APR BBC iri mu itsinda ririmo ikipe ya US Monastir ibitse igikombe cya BAL cya 2022, ndetse na River Hoops yo muri Nigeria na yo iherutse kwegukana igikombe cya shampiyona ya 2023.

Ni ku nshuro ya mbere ikipe ya APR BBC igiye kwitabira BAL, dore ko inshuro 3 zabanje hitabiriye amakipe ya Patriots BBC, yaryitabiriye ku nshuro yaryo ya mbere ndetse ikagarukira muri ½, na REG BBC yo yitabiriye inshuro 2 ziheruka ariko ikaba itarabashije kurenga ¼.

THE GRAND LUX HOTEL DOHA, Hotel ikipe ya APR BBC icumbitsemo.

Dore abakinnyi ikipe ya APR yahagurukanye

Ntore Habimana, Jean Jacques Wilson Nshobozwabyosenumukiza, Robeyns William, Axel Olenga Mpoyo, Chris Rutayisire, Adonis Filer, Dario Nathan Henry Hunt, Elie Kaje, Michael Dixon, Zion Styles, Bush Wamukota, Dan Kimasa,Ally Kazingufu and Larsson Shema Niyibizi.