Nyuma yo kwitwara neza mu mikino y’igikombe cya Afurika cya 2023 Africa nations Women Championship 2023 cyabereye mu gihugu cya Kameruni (Cameroon), Munezero Valentine yabengutswe n’amakipe atandukanye yaba ku mugabane w’iburayi ndetse na Afurika ariko aza kumvikana n’ikipe yo mu cyiciro cya mbere mu gihugu cya Tuniziya ya SFAX VOLLEYBALL SPORT CLUB.

MUNEZERO Valentine yari umukinnyi ngenderwaho mu ikipe ya APR y’abagore ndetse akaba amaze gutwarana na yo ibikombe bitandukanye byaba iby’imbere mu gihugu ndetse no hanze harimo na shampiyona yatwaye mu myaka 2 yikurikiranya (2021, 2022.

Munezero yahembwe nk’umukinnyi watatse imipira neza mu gikombe cya Aafurika (Best Outside Hitter) Ibi bikaba byaraje bikurikira ibindi bihembo bitandukanye yabonye muri iri rushanwa.

Munezero kandi amaze gukina imikino yo ku rwego rwa Afurika y’amakipe (Club Championship) itandukanye ari kumwe n’ikipe ya APR ndetse iheruka yabereye mu gihugu cya Tuniziya bakaba baregukanye umwanya wa 6.

MUNEZERO yatangiye gukina volleyball mu cyiciro cya mbere muri 2018 ubwo yari muri IPRC KIGALI aza kuvamo yerekeza muri APR VC yari akirimo kujyeza magingo aya.

Amakuru ajyera kuri Kigali Today ni uko Valentine yasinye amasezerano y’umwaka umwe ushobora kongerwa muri iyi kipe yo muri Tuniziya.