Umuturage niwe zingiro ryo kubungabunga ibidukikije

Ikigo cy’igihugu cyo kwita ku bidukikije REMA kiravuga ko umuturage akwiye kongererwa ubushobozi bwo kwibeshaho neza,kuko bituma abungabu ibidukikije.

JPEG - 129.2 kb
Amakoperative akoresha uburyo bwa kijyambere mu kuhira imyaka

Umuyobozi mukuru wa REMA Eng. Coletha Ruhamya yabivuze kuri uyu wa kane 26 Mutarama 2017,mu gikorwa cyo kugabira inka 33, abanyamuryango b’amakoperative 2 yo mu mirenge ya Simbi na Kigoma yo mu karere ka Huye.

Eng. Ruhamya avuga ko iyo umuturage afite imibereho myiza bigabanya ibikorwa yakora bikagira ingaruka mbi ku bidukikije.

Yagize ati “Tuzakomeza gushyigikira ibikorwa byose bigamije gukura abaturage mu bukene kuko tuziko umuntu ari we zingiro ry’ibikorwa bigamije kwita no kubungabunga ibidukikije.”

Amakoperative yagabiwe ni Imbere Heza Karambi yo mu murenge wa Kigoma, na Twite ku Bidukikije Twiteza Imbere yo muri Simbi.

JPEG - 133.4 kb
Hatanzwe inka 33 ku makoperative 2 aterwa inkunga na LVEMPII mu karere ka Huye

Aya makoperative yombi akorana n’umushinga wo kubungabunga ibidukikije mu kiyaga cya Victoria, Icyiciro cya kabiri (Lake Victoria Environmental Management Project Phase Two) LVEMP II,ukorana na REMA.

Mu buhamya bwa Noel Maniraguha perezida wa koperative Imbere Heza,yavuze ko gukorana n’Umushinga LVEMP II byamufashije kwikura mu bukene kuko yahawemo akazi ndetse isambu ye igakorwamo amaterasi.

Ati "Nabashije kwigurira igare rifite agaciro k’ibihumbi 80.Nabashije kandi kwiyubakira inzu ku mudugudu nimuka mu manegeka, byose mbikesha umushinga LVEMP II".

Aba baturage kandi bavuga ko inka bahawe zizabaha ifumbire izifashishwa mu buhinzi bwabo bw’imboga nabwo bafashwamo na LVEMP II,zikazanatanga umukamo uzafasha kuzamura imirire.

Umuyobozi w’Akarere ka Huye Kayiranga Muzuka Eugene yashimiye REMA na LVEMP II ku bufatanye mu kubungabunga umugezi wa Mwogo.

JPEG - 97.6 kb
Umuyobozi w’akarere ka Huye ashyikiriza inka umwe mu bagenerwabikorwa ba LVEMP II

Yabashimiye kandi uburyo bateza imbere imibereho myiza y’abaturage anizeza ko inka zatanzwe zizitabwaho kugirango zitange umusaruro.

Uretse amakoperative abiri yahawe inka, umushinga LVEMP II unatera inkunga andi makoperative atanu muri aka Karere, yose uko ari 7 akaba yaratewe inkunga ikabakaba miliyoni 100 RWf.

Ibitekerezo   ( 1 )

icyogikorwanicyiza. arikokucyinjye iyonka itaranjywraho nizere ubutaha?

muhayimana aloys yanditse ku itariki ya: 27-01-2017

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka