Inkuru dukesha Ikinyamakuru Tuko, cyo muri Kenya, ivuga ko mu gihe hari abataka ko inzara ibica, uwo mugabo witwa Jean Marie wo muri Congo, we arya amatafari, umucanga ndetse n’amakara.

Uwo mugabo bivugwa ko nta burwayi bwo mu mutwe afite, cyangwa se ubundi ubwo ari ubwo bwose, gusa ngo yumva ibyo kurya bye akunda kandi abona mu buryo butamugoye ari ayo matafari, amakara ndetse n’imicanga, n’ubwo bitangaza abantu benshi iyo babibonye.

Uyu muryi udasanzwe yagize ati: " Ibi ni byo biryo byanjye nkunda, ibyo kurya bisanzwe byatakaje icyanga cyabyo cy’umwimerere wabyo, ni cyo gituma nkunda kurya umucanga, amakara ndetse n’amabuye. Nshobora no kugerageza kurya ibyo kurya bisanzwe, ariko ibyo nkunda cyane ni ibyo bitatu.

Iyo abo mu muryango we barimo kurya ibyo kurya bisanzwe, we ajya ukwe akarya ibyo biribwa bye akunda, kuko ibyo bindi bisanzwe biba byateguwe ku meza mu muryango we, ngo ntiyabigereranya n’uko ayo matafari cyangwa ibyo bindi arya bimuryohera.

Yagize ati, "Natangiye kurya amabuye kuva navuka. Inshuro nyinshi bagerageje kumbuza kurya amabuye, ariko kuko nayakundaga cyane bageze aho bararekera. Iyo mbiriye ndahaga, singorwa no gushaka ibindi biribwa, kuko ibyo nkunda kurya biraboneka ku buryo buhoraho”.

Gusa, bivugwa ko uwo mugabo atigeze ashaka umugore, kuko ngo bishobora kuba bigoye kubana n’umugabo urya, ibintu bidasanzwe nk’ibyo.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 1930 )