Uretse kuzitira ku nyubako zikomeye ku buryo bitakoroha kuzegera, inzego z’igipolisi cy’u Burundi zatangiye kugenzura bikomeye abinjira muri iki giguhugu barebwa ibyangombwa, gusaka ibyo binjirana hamwe nibyo basohokanye.

Abagenzi binjira mu gihugu cy’u Burundi kimwe n’abasohoka barasakwa bikomeye.

Ibi bikorwa bitangiriye aho umutwe wa Al- Shabab usohoreye itangazo mu kinyamakuru cyo muri Kenya Daily Nation, uvuga ko niba u Burundi butavanye ingabo zabwo muri Somalia, uzabutera hagati y’amatariki ya 26 ndetse na 30 Mata uyu mwaka.

Umunyamakuru wa Kigali today washoboye kuvugana nabamwe bashoboye kubona uburyo inzego z’umutekano zakajijwe bavuga ko ahantu hahurira abantu benshi batangiye gushyirwa abashinzwe umutekano, naho mu masaha y’umugoroba abantu ntibari gutinda mu tubari.

Imodoka zose zinjira hamwe n’izisohoka Bujumbura zirasakwa bikomeye.

Ahakorerwa na ambasade ntibyemerwa ko hahagarara abantu cyangwa ngo hagire imodoka hafi, bamwe mubatuye mu mujyi wa Bujumbura bakaba bavuga ko bitari bisanzwe bitangiye gukorwa kubera kwikanga ko Al- Shabab ishobora kubatungura.

Mu guhumuriza abaturage Minisitiri w’umutekano mu Burundi, Gabriel Niyizigama mu kiganiro yagiranye n’abanyamakuru akaba yaratangaje ko abaturage badakwiye gukurwa umutima ibyatangajwe na Al- Shabab kuko umutekano urinzwe bikomeye, cyakora z’Ambasade zikorera mu gihugu cy’uburundi zimwe zahamagariye abakozi bazo hamwe n’abanyagihugu kwirinda kujya ahantu hari abantu benshi kuko hari muterwa.

Kuri Ambasade kirazira kuhahagarara kubera iterabwoba.

Sylidio Sebuharara