Nyuma y’uko iyo mpanuka ibaye mu minsi 17 ishize, abashinzwe ubutabazi bakoraga ubutaruhuka, bashaka uko batabara abo bakozi bari baguweho n’itaka ry’umusozi w’aho bacukuraga rirabataba baheramo muri Leta ya Uttarakhand, mu Majyaruguru y’u Buhinde.

Inkuru ya RFI ivuga ko amateleviziyo atandukanye, yakomezaga kugenzura ko hari urumuri rwaboneka ku mpera z’uwo muyoboro mu gihe abashinzwe ubutabazi bari bavuze ko basigaje metero nkeya ngo bagere kuri abo bantu.

Ibitaro bidahoraho byahise bishyirwa kuri uwo muyoboro wo munsi y’ubutaka, bifite ibitanda 41, kugira ngo bisuzume abo bantu bakimara gutabarwa.

Ahagana saa moya z’umugoroba ku isaha yo mu Buhinde, nibwo imodoka z’imbangukiragutabara zari zitangiye gutwara aba mbere batabawe, nyuma y’amasaha abiri, abakozi bose ngo bari bamaze gutabarwa.

Abatabawe bose bahitaga bapimwa byihuse, nyuma y’uko bari bamaze iyo minsi 17 munsi y’ubutaka batunzwe n’ibyo kurya n’imiti by’ibanze, mu bukonje buri hafi ya zero 0C.

Gutabarwa kw’abo bakozi 41 byasabye abacukuzi b’abahanga basanzwe bucukura muri metero nyinshi z’ubujyakuzimu mu mabuye y’agaciro.

Mu itangazo ryasohowe na Minisitiri ushinzwe ubwikorezi mu Buhinde, yagize ati “Ndumva nishimye byuzuye kandi ndanezerewe kuko abakozi bose bari baridukiweho n’umusozi ku muyoboro wo munsi y’ubutaka wa Silkyara bose uko ari 41 batabawe kandi bikagenda neza.

Ni igikorwa cyahuriweho n’inzego nyinshi, bituma ubu gifatwa nka kimwe mu bikorwa by’ubutabazi bikomeye kurusha ibindi byabeyeho muri iyi myaka ya vuba aha”.

Abayobozi b’u Buhinde, barimo Minisitiri w’Intebe w’u Buhinde Narendra Modi,bagaragaje ibyishimo batewe no kuba ubwo batabazi bwakorwaga basiganwa n’amasaha bwageze ku ntego yabwo abantu bagatabarwa bose ari bazima.