Kurekura Abanya Israel byatangiye gushyirwa mu bikorwa tariki 24 Ugushyingo 2023 nkuko byari bikubiye mu masezerano y’impande zombi yo gutanga agahenge k’iminsi ine hagakurikiraho guhererekanya abashimushwe ku mpande zombi Israrel nayo yahise irekura Abanyepalesitina 39.

Abarekuwe babanje gusuzumwa mu bitaro byo mu Misiri kugira ngo babapime barebe ubuzima bwabo uko buhagaze mbere y’uko bajyanwa mu gihugu cya Israel.
Mu barekuwe harimo abana n’abagore bakaba bajyeze muri Israel babifashijwemo n’umuryango utabara imbabare Croix rouge.

Muri aya masezerano yahagarariwe na Qatar, bitegekanyijwe ko impfungwa za Israel 50 hamwe n’iza Palestina 150 zizarekurwa mu minsi ine y’agahenge ibihugu byombi byemeranyijweho.

Aya masezerano aravuga ko Israel izahagarika ibitero yagabaga muri Gaza mu gihe cy’iminsi ine gusa ariko yo Israel ikavuga ko iyi minsi ishobora kwiyongera mu gihe nibura Hamas yarekura abantu 10 buri munsi mubo yashimuse.

Minisitiri w’intebe wa Israel, Benjamin Netanyahu yatangaje ko hamaze kurekurwa abafashwe bugwate barimo abana n’abagore.
Ati“Israel yiyemeje kubohoza abafashwe bugwate na Hamas bose ibyo ndabishimangira ko tuzabazana bose kuko ariyo ntego dufite”.

Muri aka gahenge k’iminsi ine, amakamyo 60 atwaye imfashanyo yamaze kwinjira muri Gaza kugira ngo zihabwe abakuwe mu byabo n’iyi ntambara.

Gusa muri aka gahenge nta muturage wa Palesitina wakuwe mubye n’intambara wemerewe gusubira mu rugo rwe kuko basabwe ko bagomba kuguma mu bice bahungiyemo.