Ni tombola yakozwe nyuma y’uko muri iki Cyumweru hasojwe imikino ya 1/8 aho amakipe ya Real Madrid,Man City,Arsenal,Bayern Munich,PSG,FC Barcelona,Borussia Dortmund na Atletico Madrid yabonye itike ya 1/4 yagombaga gutombora uko azahura kuri uyu wa Gatatu.

Umukino wa mbere uzaba ukomeye ni umukino uzahuza Real Madrid na Man City,ni umukino uzakomera kubera uko amakipe ahagaze ubwa yo ariko nanone ikaba ari inshuro ya kabiri ahuye mu mikino ya Champions League yikurikirana nyuma yo guhurira muri 1/2 umwaka ushize. Icyo gihe Man City yasezereye Real Madrid iyitsinze ibitego 5-1 mu mikino ibiri nyuma yo kunganya 1-1 muri Espagne bagera mu Bwongereza igatsinda 4-0.

Arsenal yari imaze imyaka 14 itagera muri 1/4 cya Champions League ku wa Kabiri w’iki Cyumweru nibwo yasezereye FC Porto kuri penaliti 4-2. Muri iki cyiciro iyi kipe iyoboye shampiyona y’u Bwongereza izahura na Bayern Munich iri ku mwanya wa kabiri mu Budage aho umukino uheruka guhuza amakipe yombi byari muri 1/8 Bayern Munich itsinda Arsenal 5-1 mu mikino ubanza n’uwo kwishyura ikayisezerera ku giteranyo cy’ibitego 10-2.

Ikipe ya FC Barcelona yageze hano isezereye Napoli izahura na PSG yo mu Bufaransa yo yasezereye Real Sociedad. Aya makipe amaze guhura inshuro enye muri iri rushanwa aho mu mwaka w’imikino wa 2016-2017 FC Barcelona yasezereye PSG muri 1/8 iyitsinze ibitego 6-5 mu mikino ibiri gusa na PSG iyihimuraho iyisezerera muri icyo cyiciro iyitsinze 5-2 mu mikino ibiri mu mwaka w’imikino wa 2020-2021.

Umukino wa kane uzahuza amakipe asa nk’aho ari ku rwego rumwe muri iki gihe ni Atletico Madrid muri 1/8 yasezereye Inter kuri penaliti 3-2 izakina na Borussia Dortmund yo yasezereye PSV Eindhoven iyitsinze ibitego 3-1 mu mikino ibiri. Ubwo amakipe yombi aheruka guhura ni mu mwaka w’imikino wa 2017-2018 aho muri 1/4 Dortmund yasezereye Atletico Madrid iyitsinze ibitego 4-2 mu mikino ibiri.

Imikino ibanza iteganyijwe tariki 9 Mata 2024 mu gihe imikino yo kwishyura izakinwa hagati ya tariki 16 na 17 Mata 2024.

Uko amakipe azakomeza azahura muri 1/2

Ikipe izakomeza hagati ya ya Real Madrid na Man City muri 1/2 izahura n’ikipe izakomeza hagati ya Arsenal na Bayern Munich mu gihe ikipe izagera muri 1/2 hagati ya FC Barcelona na PSG izahahurira nizaba yakomeje hagati ya Atletico Madrid na Borussia Dortmund.

Imikino ibanza ya 1/2 iteganyijwe hagati y’itariki 30 Mata na tariki ya 1 Gicurasi 2024 mu gihe iyo kwishyura iteganyijwe hagati ya tariki 7 ndetse n’iya 8 Gicurasi 2024 naho umukino wa nyuma ukazakinwa tariki 1 Kamena 2024 kuri stade ya Wembley mu Bwongereza.