Perezida wa Repubulika Paul Kagame yabwiye abayobozi ko igihe cy’amatora u Rwanda rurimo kigomba kuba umwanya wo kurushaho kwegera abaturage no kumenya ibibazo byabo.

Perezida Kagame yabwiye abayobozi ko igihe cy'amatora kigomba kuba umwanya wo kurushaho kwegera abaturage

Yabitangaje ubwo yakiraga indahiro z’abayobozi bashya ari bo Depite Niyitegeka Winifride wasimbuye Depite Mukayisenga Françoise witabye Imana n’umuvunyi wungirije ushinzwe gukumira no kurwanya akarengane, Yankurije Odette, kuri uyu wa gatanu tariki ya 07 Nyakanga 2017.

Perezida Kagame yagize ati “Ibihe tugiyemo by’amatora biduhaye umwanya wo kujya mu giturage hamwe twese, tukegera abaturage mu gikorwa cy’amatora.

Igihe cy’amatora kizaduha uburyo bwo kugera ku Banyarwanda aho batuye, tugafatanya na bo kwiga ibibazo bigihari.”

Akomeza avuga ko kwegera abaturage bizafasha abayobozi gushyiraho ingamba zihamye zo guteza imbere igihugu mu buryo bwihuse kandi buri Munyarwanda abigizemo uruhare.

Perezida Kagame yakomeje abwira abayobozi bashya barahiye ko bagomba gukorera hamwe n’abandi bayobozi mu rwego rwo kurushaho kuzamura igihugu.

Agira ati “Dukomeze uburyo bw’imikorere n’imikoranire ikwiye kugira ngo tugeze igihugu cyacu aho twifuza.”