Minisitiri w’Uburinganire n’Iterambere ry’Umuryango, Dr Uwamariya Valentine, tariki 18 Werurwe 2024, nibwo yagejeje ku Nteko umushinga w’itegeko rigenga abantu n’umuryango.

Uyu mushinga uteganya guhuriza hamwe itegeko rigenga umuryango n’irigenga imicungire y’umutungo w’abashakanye, impano n’izungura hakajyaho itegeko rimwe, ariko rijyanye n’ibihe kubera impamvu zirimo ikibazo cy’abashyingirwa, umwe muri bo agambiriye kuzanyaga imitungo ya mugenzi we binyuze mu butane.

Uyu mushinga w’itegeko uha umucamanza ububasha bwo gusuzuma ibijyanye no kugabana umutungo, no kuba yakwemeza kutawugabana mu buryo bungana mu gihe ubutane bubaye mbere y’imyaka itanu.

Uyu mushinga w’itegeko uteganya ko inkiko zizamburwa ububasha bwo kunga abashaka ubutane. Iyi gahunda yo kunga abashakanye, biteganyijwe ko izagenwa n’iteka rya Minisitiri n’imiterere n’imikorere by’Inama y’Umuryango.

Uteganya ko kudahuza kw’abashyingiranywe byonyine bishobora kuba impamvu Urukiko ruzajya rushingiraho rubatandukanya.

Imiterere y’iri tegeko abantu batandukanye bavuze ko nirimara kwemezwa, rizaha abashakanye uburenganzira busesuye bwo kurengera imitungo y’umwe muri bo igihe batandukanye.

Munyeshyaka Anicet ni umusore w’imyaka 34, avuga ko muri iki gihe ibintu byo gushyingiranwa umwe akurikiye imitungo kuri mugenzi we byeze cyane, kandi ugasanga mu gihe gito baratandukanye urugo rutamaze kabiri.

Ati “Nk’ubu umukobwa nkamushima nkamurambagiza tugakora ubukwe nkamugira umugore, akaza tukabana ariko atankunda akaza akurikiye imitungo mfite, twagira icyo dupfa tukayigabana yose turinganije, urumva ko mba mpombye ibintu naruhiye n’uwo nakunze nkamubura”.

Robert Mugabe, umunyamakuru akaba n’umunyamategeko, asanga iri tegeko rizakemura byinshi ku bantu bashakanaga umwe agamije gutwara imitungo ya mugenzi we.

Ati “Erega amategeko hari aho adatanga ubutabera, none se niba umuntu aje nta kintu afite mwagera mu rugo mwagirana ibibazo akayoboka inkiko, hanyuma babatandukanya agatwara icya kabiri cy’umutungo yagusangaye urumva uba utarenganye?”

Mugabe asanga iri tegeko rizatuma abantu bazahindura imyumvire yo gushaka umuntu bamukurikiyeho imitungo, kuko azaba azi ko igihe bazatandukana ntacyo azabona.

Umwe mu bakobwa utarashatse ko amazina ye ajya mu itangazamakuru, avuga ko ubu agize imyaka 40 atarashaka umugabo, kubera ko abasore bose ahuye nabo bamurambagiza bakurikiye imitungo n’akazi kamuhemba neza afite.

Ati “Iri tegeko rizatuma abantu banabohoka bashake kuko batazaba bikanga ko igihe urugo rwabananiye bazatakaza imitungo yabo, yakabarengeye igihe batakiri kumwe n’abo bashakanye”.

Uyu mukobwa avuga ko gushakana hagati y’umugabo n’umugore, umwe akurikiye ubushobozi ku wundi, ubisanga mu ngeri z’abantu batandukanye mu gihe kera akenshi byabaga biri ku mukobwa gusa.

Ati “Ari abasore ari inkumi bose bareba ahari ubushobozi, iri tegeko rero ndabona ari ryiza kuko rizagira ibyo rirengera hagati y’abashakanye batanganya ubushobozi, kuko igihe bananiwe kubana umwe rizamurengera ku mitungo”.

Minisitiri w’Uburinganire n’Iterambere ry’Umuryango, Dr Uwamariya Valentine, yabwiye Abadepite ko hari icyo iri tegeko rizakemura.

Ati "Hari ikibazo cyagaragaye mu nkiko cy’uko hari abashyingirwa, nyuma y’igihe gito bagasaba ubutane bagamije kugabana imitungo. Mu gukemura iki kibazo, uyu mushinga uraha umucamanza ububasha bwo gusuzuma ibijyanye no kugabana umutungo mu buryo bungana, igihe abasaba ubutane bari barashyingiranywe mu buryo bw’ivangamutungu rusange. cyangwa uburyo bw’ivangamutungo muhahano ndetse no kuba yakwemeza kutagabana mu buryo bungana, mu gihe ubutane bwabaye mbere y’imyaka itanu.”

Mu gihe cyo gushinga urugo, uyu mushinga uteganya ko gutangaza mu ruhame uburyo bw’imicungire y’umutungo w’abashakanye bitazongera kubaho, ahubwo bizajya bikorerwa imbere y’umwanditsi w’irangamimerere mu ibanga, hasigaye nibura iminsi irindwi ngo ubukwe bube.

Unemerera abagiye gushyingiranwa kwigenera ubundi buryo bw’imicungire y’umutungo wabo uko babyumva, mu gihe cyose ubwo buryo butanyuranya n’amategeko ndemyagihugu n’imyifatire mbonezabupfura.

Ubusanzwe habagaho uburyo butarenze butatu gusa, ari bwo ivangamutungo rusange, ivanguramutungo risesuye n’ivangamutungo w’umuhahano.

Umushinga w’iri tegeko rigenga abantu n’umuryango, unateganya ko umuntu wujuje imyaka 18 y’amavuko yemererwa gushyingirwa, ariko bigatangirwa uburenganzira n’umwanditsi w’irangamimerere.

Mu gihe cyo gushyingirwa, umwanditsi w’irangamimerere ni we gusa uzajya afata ku ibendera.
Minisitiri Dr Uwamariya avuga ko gushyingirwa ari isezerano nk’ayandi, kandi ibijyanye no kurahira abantu bafashe ku ibendera hari ababikerensaga bakavuga amagambo aterekeranye n’ibindi, akaba ari yo mpamvu kurahira bafashe ku ibendera bitazongera kubarimo basezerana.

Mu bindi, uyu mushinga w’itegeko uteganya harimo ko irage rizajya rikorwa mu buryo bw’inyandiko mpamo, hagamijwe kwirinda impaka zivuka nyuma y’urupfu rwa nyakwigendera hagati y’abazungura zishingiye ku ihindurwa rya bimwe mu bikubiyemo, aho bamwe bashinja abandi gukora inyandiko mpimbano, ugereranyije n’inyandiko bwite yakozwe na nyakwigendera.

Nubwo ariko ingeri zitandukanye zigaragaza ko igihe iri tegeko rizaba ryemejwe, rizafasha byinshi mu gukemura igabana ry’umutungo mu gihe abashakanye barimo batandukana, Abadepite bo bagaragaje impungenge kuri uyu mushinga w’itegeko, bavuga ko uri koroshya uburyo bwo gutanga gatanya ku buryo ushobora kuzitiza umurindi.

Mu mwaka wa 2022/23, inkiko z’u Rwanda zemeje gatanya za burundu 3075 ku bashakanye mu buryo bwemewe n’amategeko.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1484 )