Ni mu muhango wo kwizihiza umunsi w’intwari ku nshuro ya 24 wizihirijwe ku rwego rw’intara mu Murenge wa Shingiro mu Karere ka Musanze.

Guverineri Gatabazi yibukije abaturage ko abana bakurira mu miryango mizima, abantu bagashyira hamwe barushaho kubaka u Rwanda.

Yagize ati “Turashaka ko abana bakurira mu rugo ruzima umugore n’umugabo bagashyira hamwe. Ntabwo ushobora kuba intwari urwana n’umugore, ntabwo ushobora kuba intwari abana utabajyanye mu ishuri, ntabwo waba intwari ufata abana ku ngufu.”

Yashimiye kandi ingabo zitanze zibohora igihugu zimwe zikahagwa kugira ngo Abanyarwanda bashobore kwizihiza umunsi nk’uyu.

Ati “Ndagira ngo dushimire intwari zabohoye u Rwanda uyu munsi tukaba dutekanye, ngabo z’u Rwanda muri hano namwe bapolisi mwakoze akazi gakomeye, turabashimiye cyane kandi tubikuye ku mutima.”

Kuba umurenge wa Shingiro ufite abarinzi b’igihango umunani muri 15 bagize Akarere ka Musanze, ni bimwe mu byateye ubuyobozi bw’Intara y’Amajyaruguru kuhizihiriza umunsi w’intwari.

Abo baturage barokoye bamwe mu Batutsi bahigwaga muri Jenoside, bambitswe impeta z’ubutwari batangariza Kigalitoday ko bishimiye gushimirwa mu ruhamwe.

Bizimana Pio umwe mu bambitswe impeta yavuze ko yakijije Abatutsi bari bihishe ahantu igitero cy’Interahamwe cyari kigiye kugera ngo kibice.

Ati “Narabahishe ku buryo umuryango wose nawurokoye, interahamwe zikimenya ko ari njye wabarengeje baraje baramfata baranjyana ngo ndi icyitso, mara ibyumweru bibiri mu ishyamba kugeza ubwo Izamarere zifashe igihugu.”

Insanganyamatsiko y’uyu mwaka igira iti“Dukomeze ubutwari twubaka u Rwanda twifuza”.