Ayra Starr yatangaje ibi nyuma y’uko, Christopher Maurice Brown, umunyamerika w’icyamamare muri RnB, atangaje ko uyu mukobwa ukomoka muri Nigeria azaba ari mu itsinda ry’abahanzi bazamufasha mu bitaramo bigamije kumenyekanisha alubumu ye nshya “11:11” aherutse gushyira hanze.

Ibi bitaramo bizazenguruka Leta Zunze Ubumwe za Amerika na Canada, bizatangira ku ya 5 Kamena uyu mwaka, bikazahera I Detroit, muri leta ya Michigan, kuri Little Caesars Arena. Azafatanya kandi n’umuhanzikazi Muni Long nawe uri mu bakunzwe muri iyi minsi mu ndirimbo “Made for Me”.

Mu kiganiro, Ayra Starr wamamaye mu ndirimbo “Rush” aherutse kugirana na Kiss FM mu Bwongereza, yavuze ko yatunguwe no kumva azaba ari mu bahanzi bazashyigikira Chris Brown mu bitaramo byo kumurikira abakunzi be alubumu 11:11.

Uyu muhanzikazi yagize ati: “Nabyumvise bwa mbere [Kuzengurukana na Chris Brown] mu cyumweru cya Grammy. Nari nishimye cyane. Oya, ntabwo narize. Birashoboka ko nzarira mu gitaramo cyanjye cya mbere muri ibi bitaramo.

Ayra Starr yakomeje avuga ko Chris Brown, amaze igihe kinini aha agaciro umuziki Nyafurika, aho ashyigikira abahanzi bo muri Afurika kandi ko biba bushimishije kubona umuhanzi w’izina rikomeye nk’irye ashyigikira umuco Nyafurika.

Ati: “Birashimishije kubona umuziki nyafurika umenyekana ku isi. Byasabye igihe kirekire. Umuziki nyafurika ukomeje kwigaragaza. Mubyukuri, Afrobeats yahoze ari ubwoko bwiza bwa muzika ku isi.”

Chris Brown ni umwe mu bahanzi bakomeye kandi bagwije igikundiro vuba aha watangiye gukorana n’abahanzi bo ku mugabane wa Afurika, harimo nka Davido bamaze gukorana indirimbo zirenga esheshatu nka “Blow my Mind”, “Shopping Spree”, “Sensational” bafatanyije na Lojay, “Baby” na “Lower Body” n’izindi